Зөвшөөрлийн зөвлөл ээлжит хоёрдугаар хурлаа зохион байгууллаа.
Эхний хурлаар хууль давсан бүртгэл, журам, актуудыг хүчингүй болгох чиглэл өгсний дагуу өнөөдөр төрийн 7 байгууллага, зөвшөөрлөөс давсан 28 журмыг бүхэлд нь, 8 журмыг хэсэгчлэн цуцалсан байна.
Үүнд Хот байгуулалт, Байгаль орчин, Эрүүл мэнд, Цахим хөгжил, Хууль зүй зэрэг яамд, Харилцаа холбооны зохицуулах хороо, Дархан-Уул, Дундговь аймаг орон нутгийн төрийн захиргааны байгууллагууд багтжээ.
Харин “Зөвшөөрлийн тухай хууль”-ийн хэрэгжилтийг хангуулаагүй буюу хууль давсан бүртгэл, журам, актуудаа цуцлаагүй Эрчим хүч, Уул уурхай, Боловсролын яамдуудад зөвлөлөөс ажлын хэсэг гарган ажиллахаар боллоо.
“Ажлын хэсэг салбар бүрд хэрэгжиж буй хууль тогтоомжид иж бүрэн үнэлгээ өгнө. Банк санхүү, гааль татвар зэрэг салбарт зөвшөөрөл олгох харилцааг зохицуулж буй хууль, дүрэм журамд шинжээч томилон ажиллуулна” гэж Монгол улсын сайд, Засгийн газрын хэрэг эрхлэх газрын дарга Н.Учрал онцолж байна.
